Maloko a kagišano ya bohwa le setšhaba ka kakaretšo a mengwa go kgetha maloko a Khansele ya Musiamo wa Robben Island. Khansele e tla ba le maloko a go ka ba a šupa, ao a tla thwalwago ke Tona ya Bokgabo le Setšo. Go kaonetša gore go be le leloko le tee leo le nago le maitemogelo a merero ya matlotlo.
Ge dikgetho di romelwa, go swanetšwe go elelwe gore mokgethwa o hloka kwešišo ka bophara ya bohwa, maitemogelo a taolo le matlotlo, tsebo ya molao le tsebo ya papatšo le kgokagano, go kgoboketša tšhelete, thuto le nyakišišo ya setšo/leago, gape le maikemišetšo a go dira ditirelo tša setšhaba le botwetwenyi bjo bo itšego ka go lefapha la mošomo wa Musiamo wa Robben Island.
Sehlopha sa go kgetha se tla thwalwa ke Tona gore se thale lenaneo la bonkgetheng ba maleba go tšwa go dikgetho tšeo di amogetšwego. Taetšo ya sehlopha sa go kgetha e tla ba go netefatša gore kgetho ya mafelelo e akaretša batho bao ba nago le dinyakwa goba maitemogelo ao a kgethegilego goba kgahlego ka go mafapha a maleba, bao ba e e lego baemedi, go fihla ka mo go ka kgonegago, ba ditšhaba ka moka tša bong ka bobedi, gape le gore kgetho ka kakaretšo ke ya maemo a godimo a bokgoni ka mo go ka kgonegago.
Mang le mang yo a ratago go kgetha maloko a Khansele ya Musiamo wa Robben Island o swanetše a romele tše di latelago:
a lengwalo leo le nago le maina ka botlalo, aterese le dinomoro tša mogala le tša fekese tša mokgethwa, gomme a fe le mabaka a go kgetha nkgetheng yoo.
b tokumente ya tlhalošo ya mokgethwa, yeo e hlalošago maloka a gagwe a gore o swanetšwe a thwalwe;
c taodišo ye kopana yeo e saenilwego ke mokgethwa, yeo ka go yona a dumelelago kgetho; le d maina a balaki ba bararo ba go tseba mokgethwa bao go tla bago bonolo go ikopanya le bona.
Ga go kgetho yeo e tla elwago hloko ka ntle le ge dilo tšeo di laeditšwego ka mo godimo di akareditšwe.
